«Реал» футболчилари Чемпионлар лигасининг жорий мавсумида бешта қизил карточка олишди.

Мадридликлар чорак финалнинг жавоб учрашувида «Бавария»дан мағлубиятга учраб (3:4, биринчи ўйин – 1:2), мусобақани тарк этди.

Ушбу ўйинда «қаймоқранглилар»нинг икки футболчиси майдондан четлатилди: Эдуардо Камавинга Ҳарри Кейнга нисбатан ишлатилган фолдан сўнг тўпни рақибга бермагани учун иккинчи сариқ карточкани олди, Арда Гюлер эса финал ҳуштагидан кейин ҳакам билан баҳслашгани учун тўғридан-тўғри қизил карточка билан жазоланди.

Бундан аввалроқ, ушбу мавсумда Даниэль Карвахаль умумий босқич доирасидаги «Марсель» (2:1) билан ўйинда, Рауль Асенсио ва Родриго эса «Бенфика»га (2:4) қарши баҳсда қизил карточка олган эди.

Бешта четлатиш — бу Чемпионлар лигасининг жорий мавсумида иштирок этаётган жамоалар орасидаги энг юқори кўрсаткичдир.