«Милан» марказий ҳимоячиси Маттео Габбия жамоа бош мураббийи Массимилиано Аллегрининг эҳтимолий кетиши мавзусида ўз фикрларини билдирди. Аллегри ушбу лавозимни ўтган ёзда эгаллаган эди, унинг шогирдлари ҳозирда А Серия турнир жадвалида учинчи ўринда боришмоқда.
«Аллегри — жаҳон даражасидаги мураббий. Мен бутун жамоа номидан гапиряпман, биз мураббийдан жуда мамнунмиз ва у биз билан узоқ вақт қолишига умид қиламиз. Ҳозир энг муҳими — натижалар. Биз унга 100 фоиз эргашишимиз керак, шунда ҳаммаси тўғри бўлади», — дея футболчининг сўзларини келтиради Sky Sport Italia.
Сўнгги вақтларда Аллегрининг исми Италия терма жамоасида ишлаши мумкин бўлган номзодлар рўйхатида пайдо бўлди. «Скуадра адзурра» кетма-кет учинчи марта жаҳон чемпионатига чиқа олмаганидан сўнг устозсиз қолган эди.
