«Бенфика» бош мураббийи Жозе Моуриньо Мадриднинг «Реал» клубидаги бўш қолиши кутилаётган лавозимга номзодлар қаторида тилга олинмоқда.
Маълумотларга кўра, мавсум якунлангач, «қаймоқранглилар» Альваро Арбелоа ўрнига янги мураббий қидиришади. Таниқли инсайдер Фабрицио Романонинг таъкидлашича, «махсус» (The Special One) «қироллик клуби»га қайтишдан мамнун бўлган бўларди, бироқ ҳозирги вақтда у билан ҳеч қандай музокаралар олиб борилмаяпти.
Жозе Моуриньо 2010 йилдан 2013 йилгача Мадрид гранди бошқарувида фаолият юритган. Мутахассис ўтган йилнинг сентябрь ойидан буён «Бенфика»да ишлаб келмоқда ва унинг амалдаги шартномаси 2026/27 йилги мавсум якунигача мўлжалланган.
Эслатиб ўтамиз, яқинда «Реал» Чемпионлар лигаси чорак финалида «Бавария»га имкониятни бой бериб, мусобақани тарк этган эди.
