Ўтган ёзда Мадриднинг «Реал» клуби Лука Модрич билан шартномани узайтиришдан бош тортган эди. Натижада ярим ҳимоячи эркин агентга айланди ва «Милан»га кўчиб ўтди. Ҳозирда у 40 ёшда бўлишига қарамай, Италияда ажойиб мавсумни ўтказмоқда.
Инсайдер Фабрицио Романонинг маълумотларига кўра, «қироллик клуби» хорват билан хайрлашганидан афсусда ва жамоада унинг етакчилик ҳамда маҳорат сифатлари жуда етишмаётган деб ҳисоблайди. «Қаймоқранглилар» раҳбарияти хавбекнинг кетишини хато деб тан олди.
Энди «Реал» худди шундай тарих ўнг қанот ҳимоячиси Даниэль Карвахаль билан такрорланишидан қўрқмоқда. 34 ёшли испаниялик футболчининг шартномаси жорий мавсум якунида ниҳоясига етади. У эндиликда асосий таркибнинг доимий ўйинчиси бўлмаса-да, кийиниш хонасида ҳамон муҳим роль ўйнашда давом этмоқда.
