«Реал» ярим ҳимоячиси Жуд Беллингем жамоа Чемпионлар лигасини тарк этганидан сўнг ўз ижтимоий тармоқларида мухлисларга йўлланган мурожаатини эълон қилди.
Мусобақанинг чорак финалида «қаймоқранглилар» «Бавария»га ҳар иккала ўйинда ҳам имкониятни бой беришди — 1:2 ва 3:4. Мюнхенликлар кейинги босқичда «ПСЖ» билан тўқнаш келишади.
«Бу (ғалаба учун) етарли бўлмади, лекин биз курашиб, мағрур ҳолда мусобақа билан хайрлашдик. Мадридистлар, биз сизни уятга қолдирганимизни биламиз, лекин қўллаб-қувватлашингиз учун доим миннатдормиз. Сиз лойиқ бўлган ажойиб дамлар албатта қайтади. Бизда ушбу мавсумни иложи борича кучли тарзда якунлашдан бошқа чора йўқ. Яшасин, Мадрид!» — деб ёзди футболчи.
Испания чемпионатида «Реал» 70 очко билан турнир жадвалида иккинчи ўринни эгаллаб турибди ва пешқадам «Барселона»дан 9 очко ортда қолмоқда.
