Мадриднинг «Реал» клуби УЕФА Ёшлар лигаси жорий мавсумининг иккинчи финалчисига айланди. Ярим финал учрашувида Альваро Лопес шогирдлари пенальтилар сериясида «ПСЖ»дан устун келишди — 5:4.

Ўйиннинг асосий вақти 1:1 ҳисобида якунланди. 29-дақиқада парижликлар аъзоси Элайжа Ли ҳисобни очган бўлса, 83-дақиқада Либерто Наваскауэс мувозанатни тиклади. «Қаймоқранглилар» дарвозабони Хавьер Наварронинг ўйинини алоҳида таъкидлаб ўтиш жоиз, у ўйиндан кейинги 11 метрлик зарбалар сериясида 3 та зарбани қайтаришга муваффақ бўлди.

Турнирнинг биринчи финалчиси Бельгиянинг «Брюгге» жамоаси бўлганди. Улар «Бенфика»ни 3:1 ҳисобида мағлуб этишган. Финал учрашуви 20 апрель куни Лозаннадаги стадионда бўлиб ўтади. «Реал» ўз тарихида иккинчи бор финалда ўйнайди (илк бор 2020 йилда чиққан ва чемпион бўлган). «Брюгге» эса финалга илк бор етиб келди.