Madridning «Real» klubi UEFA Yoshlar ligasi joriy mavsumining ikkinchi finalchisiga aylandi. Yarim final uchrashuvida Alvaro Lopes shogirdlari penaltilar seriyasida «PSJ»dan ustun kelishdi — 5:4.

O‘yinning asosiy vaqti 1:1 hisobida yakunlandi. 29-daqiqada parijliklar a’zosi Elayja Li hisobni ochgan bo‘lsa, 83-daqiqada Liberto Navaskaues muvozanatni tikladi. «Qaymoqranglilar» darvozaboni Xavyer Navarroning o‘yinini alohida ta’kidlab o‘tish joiz, u o‘yindan keyingi 11 metrlik zarbalar seriyasida 3 ta zarbani qaytarishga muvaffaq bo‘ldi.

Turnirning birinchi finalchisi Belgiyaning «Bryugge» jamoasi bo‘lgandi. Ular «Benfika»ni 3:1 hisobida mag‘lub etishgan. Final uchrashuvi 20 aprel kuni Lozannadagi stadionda bo‘lib o‘tadi. «Real» o‘z tarixida ikkinchi bor finalda o‘ynaydi (ilk bor 2020 yilda chiqqan va chempion bo‘lgan). «Bryugge» esa finalga ilk bor yetib keldi.