Шанба куни Испания Кубоги финали бўлиб ўтди ва унда «Реал Сосьедад» пенальтилар сериясида «Атлетико» устидан ғалаба қозонди. «Матрасчилар» ўйин давомида икки бор ҳисобни тенглаштириб, баҳсни қўшимча бўлимларга қадар олиб боришди, бироқ экстра-таймларда гол урилмади (2:2). Ўн бир метрли зарбаларни эса басклар жамоаси аниқроқ амалга оширди (4:3).

Финал учрашуви якунланганидан сўнг кўп ўтмай, «Барселона» ва Мадриднинг «Реал» клублари ўзларининг ижтимоий тармоқлардаги расмий саҳифалари орқали «Реал Сосьедад»ни табриклашди.

"Реал Сосьедад"ни Испания Кубогидаги ғалаба билан қутлаймиз», — деб ёзди «кўк-анорранглилар» матбуот хизмати.

"Реал Сосьедад"ни ва клуб мухлисларини қўлга киритилган Кубок билан табриклаймиз», — дея ғолибларга юзланди «қаймоқранглилар» вакиллари.

Эслатиб ўтамиз, «Барселона» турнирнинг ярим финалида «Атлетико»га имкониятни бой бериб, мусобақани тарк этган эди. Мадриднинг «Реал» клуби эса ҳали 1/8 финал босқичидаёқ «Альбасете»дан мағлуб бўлиб, иштирокини якунлаган.