Мадриднинг «Атлетико» клуби футболчиси Маркос Льоренте Испания Кубоги финалида «Реал Сосьедад»га қарши кечган ўйиндаги муваффақиятсизлик борасида фикр билдирди. Диего Симеоне жамоаси Хулиан Альвареснинг голи эвазига асосий вақтда мағлубиятдан қутулиб қолган эди, бироқ пенальтилар сериясида басклар аниқроқ ҳаракат қилишди.
«Биринчи дақиқадаёқ гол ўтказиб юбориш жуда ёқимсиз бўлди. Биринчи бўлим даҳшатли ўтди. Танаффусдан сўнг ишлар яхшиланди, аммо пенальтилар серияси — бу лотерея. Биз ўзимизга келишимиз керак, олдинда бизни ажойиб ўйин — Чемпионлар лигаси ярим финали кутмоқда. Яқин бир неча кун жуда оғир бўлади, лекин биз бошимизни баланд кўтариб, ҳаммасини тўғри бажаришимиз шарт», — дея Льорентенинг сўзларини Atletico Universe нашри келтирмоқда.
