Испанияда навбатдаги омадсиз мавсумдан сўнг Мадриднинг «Реал» клубида жиддий қайта қуриш ишлари бошланиши ҳақида миш-мишлар тарқалмоқда. Катта эҳтимол билан, ёзда Альваро Арбелоа бош мураббийлик лавозимини тарк этади, шунингдек, бир қатор футболчилар билан хайрлашиш борасида ҳам музокаралар олиб борилмоқда.
Diario AS нашрининг хабар беришича, ўзгаришларнинг Килиан Мбаппе ва Винисиус Жуниорга мутлақо алоқаси йўқ — ҳар икки ҳужумчи «дахлсиз» деб ҳисобланмоқда. Келажакдаги лойиҳа айнан уларнинг атрофида қурилади.
Яқинда «қаймоқранглилар» Чемпионлар лигаси 1/4 финалида «Бавария»дан мағлуб бўлиб, мусобақани тарк этишди. Ла Лига чемпионлигини қўлга киритиш учун эса энди фақат мўъжиза керак — чемпионат якунига етти тур қолганда «Барселона»дан ортда қолиш 9 очкони ташкил этмоқда.
