Лионель Месси «Интер Майами»нинг «Колорадо Рэпидс» устидан қозонган ғалабасига (3:2) катта ҳисса қўшди. Аргентиналик юлдуз учрашувнинг 18-дақиқасида пенальтини аниқ амалга оширди, 79-дақиқада эса чап оёқда ўзининг анъанавий айланма зарбаси билан жамоасининг ғалаба тўпини киритди.
38 ёшли футболчининг МЛС жорий мавсумидаги голлари сони еттитага етди — у тўпурарлар рўйхатида «Нэшвилл» вакили Сэм Сарридж ва «Даллас» ҳужумчиси Петар Муса билан пешқадамликни бўлишиб турибди. Айнан Месси ўтган йилги мунтазам чемпионатда 29 та гол билан тўпурарлик пойгасида ғолиб чиққан эди.
Саккиз турдан сўнг 15 очко жамғарган «чийраклар» МЛС-2026 Шарқий конференцияси турнир жадвалида иккинчи ўринни эгаллаб туришибди.
