«Барселона»да ёзги трансферлар режалаштирилмоқда. «Кўк-анорранглилар»нинг иқтисодий имкониятлари ҳали ҳам чекланган бўлса-да, оммавий ахборот воситалари клубни қимматбаҳо футболчилар билан боғлашда давом этмоқда.

Шу билан бирга, Sport нашрининг хабар беришича, мураббий Ханс-Дитер Флик ва «Барса» техник ходимлари Чемпионлар лигасининг ҳал қилувчи ўйинларида натижаларни яхшилаш учун жамоага икки-уч нафар янги футболчи керак, деган якдил фикрга келишган. Энг нуфузли еврокубокнинг жорий мавсумида каталонияликлар 1/4 финалгача етиб боришди ва у ерда Мадриднинг «Атлетико» клубига умумий 2:3 ҳисобида имкониятни бой беришди.

«Барселона»нинг асосий трансфер мақсадлари сифатида марказий ҳимоячи Алессандро Бастони («Интер») ва ҳужумчи Хулиан Альварес («Атлетико») кўрилмоқда.