Франция чемпионатининг (Лига 1) 30-тури доирасида бўлиб ўтган «ПСЖ» ва «Лион» жамоалари ўртасидаги учрашувда парижликлар ярим ҳимоячиси Витинья жароҳат олди.
Португалия терма жамоасининг 26 ёшли аъзоси меҳмонлар ҳужумчиси Эндрик билан кечган яккакурашдан сўнг ерга ноқулай йиқилиши оқибатида шикастланган. Шу сабабли футболчи ўйиннинг 39-дақиқасида захирага олинди ва унинг ўрнига майдонга Уоррен Заир-Эмери тушди.
Мазкур учрашув «Лион»нинг 2:1 ҳисобидаги ғалабаси билан якунланди.
Таъкидлаш жоизки, «ПСЖ» жамоасини олдинда муҳим баҳс кутмоқда. Жорий йилнинг 28 апрель куни парижликлар ўз майдонида «Бавария» клубига қарши Европа Чемпионлар Лигаси ярим финалининг дастлабки учрашувини ўтказади. Витиньянинг ушбу баҳсда иштирок этиши ҳозирча сўроқ остида қолмоқда.
Маълумот учун, Витинья жорий мавсумда Франция юқори дивизионининг 27 та ўйинида майдонга тушиб, ўз ҳисобига 1 та гол ва 7 та голли узатмани ёздириб қўйишга муваффақ бўлган.
