Мюнхеннинг «Бавария» жамоаси бош мураббийи Венсан Компани жамоаси Германия чемпиони сифатида 35-титулни қўлга киритганидан сўнг ўз ҳис-туйғулари билан ўртоқлашди.

«Бу ажойиб. Мен учун ҳар бир чемпионлик — худди биринчисидек, акс ҳолда бу иш билан шуғулланишнинг маъноси йўқ. Бундай лаҳзалар катта меҳнат талаб қилади — бу фақат жорий мавсум эмас, балки бир неча йиллик меҳнат натижаси. Шундай пайтларда ғалабадан завқ олиш керак. Менда ҳис-туйғулар бор, бу муаммо эмас. Мени иш жараёнида кўрган ҳар қандай инсон буни билади. Лекин шу билан бирга хотиржамлик ҳам бор. Ҳозир энг муҳими — содир бўлаётган барча нарсадан завқланиш. Эртага эса ҳар доимгидек ишни давом эттирамиз. Статистика яхши, аммо бу ҳали якуни эмас.

Биз ўз йўлимизни давом эттирамиз. Бу, шунингдек, менталитет масаласи ҳам. Жамоамиз доим тўлиқ куч билан ўйнайди — мавсум олди тайёргарлигида бўладими ёки расмий ўйинларда. Биз таркибимиз салоҳиятидан фойдаланамиз, футболдан завқ олишни истаймиз ва бу амалга ошмоқда. Мен тўхташни истамайман. Олдимизда ҳал қилувчи ҳафталар турибди. Биз руҳан кўтаринки ҳолатдамиз, аммо бу қанчалик қийин бўлишини ҳам яхши биламиз. Ўзимизга бўлган ишончимиз кучли — футболда бу жуда катта аҳамиятга эга», — деди Компани клуб расмий сайтига берган интервьюсида.