“Ан-Насср” ҳужумчиси Криштиану Роналду Осиё Чемпионлар лигаси 2 мусобақаси чорак финалидан ўрин олган “Ал-Васл”га қарши баҳсда рақиб мухлисларининг провокациясига жавоб қайтарди. Учрашув Ар-Риёд клубининг 4:0 ҳисобидаги ғалабаси билан якунланди, португалиялик футболчи эса 11-дақиқада жамоасининг биринчи голини киритди.

Ўйин давомида мезбон мухлислар Роналдунинг диққатини чалғитиш мақсадида унинг рақобатчиси Лионель Мессининг фамилиясини айтиб ҳайқиришди. Бунга жавобан Криштиану кўрсаткич бармоғини лабига қўйиб, трибуна эгаларини сукунат сақлашга чорлади.

Роналду Саудия Арабистонидаги фаолияти давомида бундай ҳолатларга бир неча бор дуч келган: Жумладан, 2024-йилнинг февраль ойида ҳужумчи мухлисларнинг ҳайқириқларига номақбул ишора билан жавоб қайтаргани учун дисквалификация қилинган эди. Шу йилнинг кузида эса навбатдаги провокацияга у майдонда мураккаб техник ҳаракат (финт) ижро этиш орқали муносабат билдирган.

Маълумот учун, Роналду ва Месси ўртасидаги рақобат узоқ йиллардан буён футбол оламидаги асосий муҳокама мавзуси бўлиб келмоқда. Бугунги кунга келиб, ҳар икки футболчи ҳам 900 талик голли довондан ўтишга муваффақ бўлди: Криштиану Роналду ҳисобида 969 та гол ва 307 та голли узатма мавжуд бўлса, Лионель Месси 911 та гол ҳамда 447 та ассист амалга оширган. 2026-йилнинг июнь-июль ойларида Шимолий Америкада бўлиб ўтадиган Жаҳон чемпионати ушбу икки юлдуз учун охирги мундиал бўлиши кутилмоқда