«Манчестер Сити» ёзги трансфер ойнаси учун таркибни тозалашни режалаштирган. Аввалроқ жамоани ярим ҳимоячи Бернарду Силва тарк этиши маълум бўлган эди. Шунингдек, «шаҳарликлар» ҳимоячи Жон Стоунз билан ҳам хайрлашиши кутилмоқда.
Football Insider нашрининг таъкидлашича, жорий мавсум якунланганидан сўнг «Манчестер Сити»дан Омар Мармуш ва Тижани Рейндерс ҳам кетади. Иккала футболчи ҳам клубга келган вақтидан бери етарлича таассурот қолдира олишмади ва асосий таркибдаги ўринларини йўқотишди.
Мармуш ушбу мавсумда барча турнирларда 30 та ўйинда иштирок этиб, олтита гол урди ва учта голли узатмани амалга оширди. Рейндерс ҳисобида эса 44 та ўйин, еттита гол ва еттита ассист мавжуд.
