«Интер» спорт директори Пьеро Аузилио жамоа ҳимоячиси Алессандро Бастонининг «Барселона»га ўтиши мумкинлиги ҳақидаги хабарларга муносабат билдирди.

«Агар кимдир Бастонини сотиб олмоқчи бўлса, бу ҳақда матбуотда гапирмасдан, бизга қўнғироқ қилиши керак. Унинг ёзда жамоадан кетиши ҳақида ўйлашимиз учун ҳеч қандай асос йўқ. Биз Бастонидан жуда мамнунмиз ва у биз учун ажойиб ўйинлар кўрсатишда давом этишига ишончимиз комил», — дея функционернинг сўзларидан иқтибос келтирмоқда журналист Фабрицио Романо.

Жорий мавсумда 27 ёшли Бастони барча турнирларда 37 та ўйинда майдонга тушиб, 2 та гол урди ва 6 та голли узатмани амалга оширди. Бастонининг «Интер» билан шартномаси 2028 йилгача мўлжалланган. Transfermarkt портали экспертлари футболчининг қийматини 70 миллион еврога баҳоламоқда.