Матбуот анжуманининг иккинчи қисмида одатдагидек “Насаф” устози Рўзиқул Бердиев иштирок этиб, ўйин ҳақидаги фикрлари билан ўртоқлашди.

— Бугун оғир ўйин ўтказдик. Бу бежизга эмас. 26 кун ичида 6 та муҳим учрашувга майдонга тушдик. Қолаверса, бундан бир неча кун илгари “Пахтакор”га қарши жиддий баҳсни ҳам унутмаслик керак.  Ўша учрашувларда йигитларимиз кўп куч йўқотди. Шу боис бугун кам ўйин амалиётига эга бўлган бир қатор футболчиларга имкон бердик. Бу ҳам қайсидир маънода футболчилар бир-бирларини тушуниб кетишлари учун қийинчилик туғдирди. Асосийси, биз муҳим ғалабага эришдик ва ўз ҳисобимизга навбатдаги уч очкони ёзиб қўйдик. Биласиз, бизга қарши ҳар бир жамоа жиддий ҳозирлик кўради. “Сўғдиёна” ҳам бугун ўз навбатида яхши ўйин кўрсатганини таъқидлаб ўтишни истардим.

— Аввалги учрашувда майдонга чиққан Сайфиев бугун қайдномадан ҳам ўрин олмади...
— Фарруҳ ёш, иқтидорли футболчи. Келгуси жамоага катта фойдаси тегишига ишонаман. Аввалги ўйинда унга имкон бергандик. Бироз ҳаяжонланганиданми ўйини чиқмади. Нафақат у, бугун аксарият футболчилар, тан олиш керак, биз кутган ўйинни кўрсата олишмади. Аммо биз бу борада ишлашда давом этамиз, умид қиламиз. Улар ҳали ўзларини кўрсатишади.