«Ливерпуль» клуби мавсум якунида жамоани тарк этадиган Муҳаммад Салоҳга ўринбосар сифатида Рандаль Коло-Муани номзодини кўриб чиқмоқда, деб хабар бермоқда La Gazzetta dello Sport.
Манбанинг таъкидлашича, ҳозирда ижара асосида «Тоттенхэм»да тўп сураётган «ПСЖ» ҳужумчисини ўз сафига қайтаришга «Ювентус» ҳам қизиқиш билдирмоқда. Коло-Муани ўтган мавсумнинг иккинчи ярмини Турин клубида ижарада ўтказган эди ва эндиликда Италия клуби франциялик футболчининг трансферини тўлиқ сотиб олишни режалаштирмоқда.
«Бьянконери» футболчининг Туринга қайтиш истагига ишонмоқда, бироқ бунда жамоанинг кейинги мавсумда Чемпионлар лигасида иштирок этиши муҳим аҳамиятга эга бўлади.
Қайд этилишича, Коло-Муанининг трансфер баҳоси тахминан 35 миллион еврони, йиллик маоши эса қарийб 7 миллион еврони ташкил қилиши мумкин. «Ювентус» аллақачон футболчининг вакиллари билан фаол музокаралар олиб бормоқда.
Маълумот учун, АПЛнинг жорий мавсумида Коло-Муани «Тоттенхэм» сафида 25 та ўйинда майдонга тушиб, 1 та гол ва 1 та голли узатмага муаллифлик қилди.
