Лондоннинг «Арсенал» клуби ёзги трансфер ойнаси олдидан «Атлетик Бильбао» ҳужумчиси Нико Уильямсга бўлган қизиқишини янада кучайтирди. Бу ҳақда TEAMtalk нашри хабар бермоқда.
Манбага кўра, 23 ёшли футболчининг шартномасида 90 миллион евро миқдорида товон пули белгиланган. Бироқ «канонирлар» Уильямснинг трансферини 50 миллион фунт стерлинг (тахминан 57,5 миллион евро)га баҳоламоқда. Қайд этилишича, «Атлетик» ҳужумчи борасидаги жиддий таклифларни кўриб чиқишга тайёр.
Жорий мавсумда Уильямс барча мусобақаларда 28 та ўйинда иштирок этиб, 4 та гол урди ва 6 та голли узатмани амалга оширди. Футболчининг клуб билан амалдаги шартномаси 2035 йилнинг ёзига қадар мўлжалланган. Transfermarkt портали тақдим этган маълумотларга кўра, футболчининг бозор қиймати ҳозирда 50 миллион еврони ташкил этади.
