«Тоттенхэм» марказий ҳимоячиси ва сардори Кристиан Ромеронинг клубдаги келажаги мавҳум бўлиб қолмоқда. Caught Offside нашрининг хабарига кўра, 27 ёшли футболчига «Манчестер Юнайтед» асосий даъвогарлардан бири бўлиб турибди.

Манбанинг таъкидлашича, Лондон клуби Ромеронинг эҳтимолий трансферини 60–65 миллион еврога баҳоламоқда. Аргентиналик ҳимоячининг вазиятини Мадриднинг «Атлетико» ва «Реал» клублари ҳам диққат билан кузатиб боришмоқда.

Жорий мавсумда Ромеро барча мусобақаларда 32 та ўйинда майдонга тушиб, 6 та гол урди ва 4 та голли узатмани амалга оширди. Футболчининг «шпорлар» билан амалдаги шартномаси 2029 йилнинг ёзига қадар мўлжалланган. Transfermarkt портали маълумотларига кўра, унинг бозор қиймати ҳозирда 50 миллион еврони ташкил этади.