«Барселона»нинг чап қанот ҳимоячиси Алехандро Бальде бўлажак трансфер ойнасида жамоани тарк этиши мумкин. Тарқалган хабарларга кўра, испаниялик футболчига «Астон Вилла» қизиқиш билдирмоқда. Потенциал келишув қиймати 50 миллион еврога баҳоланмоқда.
Журналист Хосе Альвареснинг маълумот беришича, каталонияликлар ушбу таклифни қабул қилиш эҳтимоли жуда юқори. Клуб Бальденинг сотувидан тушган маблағни ўзларининг асосий мақсадлари — Алессандро Бастони ва Хулиан Альварес трансферларига йўналтиришни режалаштирмоқда.
«Барселона» раҳбарияти Бальдега ўринбосар сифатида «Байер» ҳимоячиси Алехандро Гримальдони танлаган. Леверкузенликлар аъзосини 10-12 миллион евро эвазига қўлга киритиш имконияти мавжуд.
Эслатиб ўтамиз, Гримальдо «Барселона» академияси тарбияланувчиси ҳисобланади, бироқ у жамоанинг асосий таркибида майдонга тушмаган. 30 ёшли футболчи Германияни тарк этгач, фаолиятини Ла Лигада давом эттириш истаги борлигини бир неча бор таъкидлаган эди.
