Англиялик машҳур ҳужумчи Раҳим Стерлинг ва Нидерландиянинг «Фейеноорд» клуби ўртасидаги ҳамкорлик якунига етмоқда. Томонлар амалдаги келишувни узайтиришдан манфаатдор эмас. Бу ҳақда derbyderbyderby.it нашри хабар бермоқда.
Маълум бўлишича, Стерлинг Роттердам клуби билан олти ойлик қисқа муддатли шартнома имзолаган эди. Бироқ тез-тез такрорланаётган жароҳатлар туфайли футболчи деярли майдонга тушмаяпти. Шу сабабли, Премьер-лига собиқ юлдузи «Фейеноорд» раҳбариятини ўз хизматларига эҳтиёж борлигига ишонтира олмади.
Жамоа бош мураббийи Робин ван Перси вазиятга қуйидагича муносабат билдирди:
«Мен Стерлингнинг қарорларини ҳурмат қиламан, бироқ биринчи навбатда жамоа олдига қўйилган турнир вазифаларини ҳал қилиш ҳақида ўйлашим керак. Бу ҳамма нарсадан муҳимроқ», — деди мутахассис.
Маълумот учун, Нидерландия Эредивизияси якунига тўрт тур қолганда «Фейеноорд» турнир жадвалида иккинчи ўринни эгаллаб турибди.
Эслатиб ўтамиз, Раҳим Стерлинг фаолияти давомида АПЛнинг «Ливерпуль», «Манчестер Сити» ва «Челси» каби гранд клублари шарафини ҳимоя қилган.
