«Борнмут» бош мураббийи Андони Ираола мавсум якунида унинг ўрнини эгаллайдиган Марко Розенинг тайинланишига муносабат билдириб, унга ўз қўлловини изҳор қилди.

«Ўйлайманки, клуб жуда ишончли қўлларда бўлади. Бу — ажойиб мураббий. Мен уни бир неча йил олдин ҳам мақтаган эдим. Унинг жамоалари кўрсатадиган ўйин менга доим ёққан ва умид қиламанки, бундан кейин ҳам шундай бўлиб қолади», — деди Ираола.

Шунингдек, испаниялик мутахассис Марко Розенинг салоҳияти ва тажрибасига юқори баҳо берди:

«У катта Европа тажрибасига эга бўлган яхши мураббий ва унинг истиқболи порлоқ. Тўғри, у билан шахсан таниш эмасман, лекин унинг жамоалари услубини доим кузатиб борганман».

Эслатиб ўтамиз, аввалроқ «Борнмут» мавсум якунида клубни тарк этадиган Ираоланинг ўрнига Марко Розе билан 3 йиллик шартнома имзолаганини расман эълон қилган эди. Немис мутахассиси фаолияти давомида «Зальцбург», «Боруссия М», «Боруссия Д» ва «РБ Лейпциг» каби жамоаларни бошқарган. Ҳозирда «Борнмут» АПЛ турнир жадвалида 9-ўринни эгаллаб турибди ва ўз тарихида илк бор еврокубокларга йўлланма олиш учун курашмоқда.