Лондоннинг «Челси» клубининг бир қатор футболчилари бош мураббий Лиам Росеньорнинг услуби ва талабларига нисбатан шубҳа билан қарай бошлади.

Daily Mail нашрининг хабарига кўра, жамоанинг кўплаб аъзолари мураббий улардан майдонда айнан нимани талаб қилаётганини тушунмаётганликларини билдиришмоқда. Сешанба куни АПЛнинг 34-тури доирасида «Брайтон»дан қабул қилиб олинган йирик мағлубиятдан (0:3) сўнг, Росеньор футболчиларнинг ўйинга бўлган муносабатини «қабул қилиб бўлмас» деб атаган эди. Бироқ жамоага яқин манбалар муваффақиятсизликлар сабабини бошқа омил билан изоҳламоқда.

«Лиам — жуда яхши инсон ва ҳамма унинг муваффақиятга эришишини истайди. Лекин ҳақиқат шундаки, кўпчилик футболчилар унинг кўрсатмаларини англа олмаяпти. У ўйинчиларни маълумот билан «кўмиб ташлайди»: жамоавий машғулотлардан ташқари, жуда кўп индивидуал топшириқлар беради. Буларнинг барчасини ёдда тутиш қийин, боз устига, мураббий ўйин давомида кўрсатмаларни ўзгартириб туради», — дейди клубдаги манбалардан бири.

Хабар қилинишича, футболчилар ва мураббий ўртасидаги мулоқотнинг бузилиши натижаларга салбий таъсир кўрсатмоқда. Жамоа аъзолари вазиятнинг яқин орада ижобий томонга ўзгаришига бўлган ишончни йўқотмоқда.

Маълумот учун, айни дамда «кўклар» Англия чемпионати турнир жадвалида 48 очко билан 7-ўринда бормоқда. Сўнгги беш ўйиндаги кетма-кет мағлубиятлар ва гол ура олмаслик серияси клуб атрофидаги босимни янада оширган.