"Челси" собиқ ҳимоячиси Франк Лебёф Лондон клуби сафидаги Энцо Фернандес ва Мойзес Кайседони етакчилик қобилияти йўқлиги учун танқид қилди.

"Жамоамизда лидерлар йўқ. Бизга дарвозабон, марказий ҳимоячи ва ярим ҳимоячи чизиқларида ҳақиқий етакчилар керак. Кайседо ва Энцо Фернандес — лидер эмас. Узр-у, лекин мен ҳақиқий етакчиларни кўрганман. Мен майдон марказида Деннис Уайз, Крэйг Бёрли ва Роберто Ди Маттео каби футболчилар билан бирга ўйнаганман. Улар ҳақиқий лидер эдилар. Ҳали Марсель Десайи, Стив Кларк каби ҳимоячилар ёки Виалли, Гуллит, Дзола каби ҳужумчиларни айтмаяпман — улар менинг давримда муваффақиятга эришган футболчилар эди", — деди Лебёф.

Шунингдек, собиқ футболчи жамоанинг ҳозирги таркиби борасида фикрларини давом эттирди:

"Мен ҳатто Роман Абрамович давридаги жамоа ҳақида гапириб ҳам ўтирмайман. Аммо ҳозирги футболчилар айни дамда "Челси"да ўйнашга лойиқ эмас. Улар етарлича кучли эмас. Ҳозир нимани ўзгартириш мумкин, билмайман. Лекин кейинги мавсумда, илтимос, раҳбарият ҳақиқий лидерларни сотиб олсин. Акс ҳолда, "Челси" ҳеч қачон биз билган ўша кучли жамоага айлана олмайди".

Маълумот учун, Лебёфнинг ушбу интервьюси клуб бош мураббийи истеъфога чиқарилиши ҳақидаги хабарлардан аввалроқ ESPN FC телеканалида эфирга узатилган эди.