Римнинг «Лацио» клуби устози Маурицио Сарри жамоасининг Италия Кубоги финалига чиққани ҳақида ўз фикрлари билан ўртоқлашди. Икки ўйин натижасига кўра «бургутлар» «Аталанта»дан устун келишди.
«Бу биз учун катта саёҳат бўлди. Биз Кубокнинг ўтган мавсумдаги икки финалчисини мусобақадан чиқариб юбордик. Энди эса «Аталанта»дан кучлироқ эканимизни исботладик. Финалга чиққанимиздан жуда хурсандмиз. Бу мавсум биз учун жуда оғир кечди», — дея мутахассиснинг сўзларини келтиради Sportmediaset.
Финал баҳсида Рим клубига «Комо»ни мағлуб этган Миланнинг «Интер» жамоаси рақиблик қилади. Маълумот учун, ҳозирда А Серия турнир жадвалида «Лацио» тўққизинчи, «нерадзуррилар» эса биринчи ўринни эгаллаб турибди.
