Лига 1нинг қолдирилган 26-тури доирасида «ПСЖ» ўз майдонида «Нант»ни 3:0 ҳисобида мағлуб этди. Ушбу учрашувда парижликларнинг грузиялик вингери Хвича Кварацхелия дубль қайд этиб, ғалабага катта ҳисса қўшди.

Ўйиндан сўнг жамоа бош мураббийи Луис Энрике Хвичанинг намойиш этаётган ўйини ва унинг майдондаги характерига алоҳида тўхталиб ўтди:

«Кварацхелия бутун мавсум давомида юқори даражадаги футбол кўрсатмоқда. Мен нафақат унинг маҳоратини, балки характерини ҳам алоҳида қайд этмоқчиман. У рақибнинг кимлигидан қатъи назар, ҳимояланиш жараёнларида ҳам фаол иштирок этади. Бу жуда муҳим жиҳат», — дея испаниялик мутахассиснинг сўзларини келтиради beIN Sports.

Жорий мавсумда Хвича Кварацхелия «ПСЖ» либосида барча мусобақаларда 42 та ўйинда майдонга тушди. Ушбу баҳсларда грузиялик иқтидор соҳиби 16 та гол ва 9 та голли узатмани ўз ҳисобига ёздириб қўйишга муваффақ бўлди.