Клаудио Раньери «Рома» билан хайрлашганидан сўнг тез орада янги ишга киришиши мумкин. 74 ёшли мутахассиснинг Рим клубини тарк этгани жума куни расман маълум бўлган эди.
Инсайдер Николо Скиранинг хабарига кўра, Раньери Италия терма жамоаси бош мураббийлигига номзодлар рўйхатига қўшилди. «Скуадра Адзурра» устози курсиси шу ой бошида Дженнаро Гаттузо истеъфога чиққанидан бери бўш қолмоқда.
Эслатиб ўтамиз, италияликлар Жаҳон чемпионатига саралашнинг ўтиш ўйини финалида Босния ва Герцеговинага пенальтилар сериясида имкониятни бой бериб, мундиал йўлланмасидан маҳрум бўлишган эди.
Клаудио Раньери ўтган йилнинг ёзидан бери «Рома»да бошқарув кенгаши маслаҳатчиси сифатида ишлаб келаётганди. Бунгача у «бўрилар»га мураббийлик қилган ва шундан сўнг мураббийлик фаолиятини якунлаганини эълон қилган эди.
