Klaudio Ranyeri «Roma» bilan xayrlashganidan so‘ng tez orada yangi ishga kirishishi mumkin. 74 yoshli mutaxassisning Rim klubini tark etgani juma kuni rasman ma’lum bo‘lgan edi.

Insayder Nikolo Skiraning xabariga ko‘ra, Ranyeri Italiya terma jamoasi bosh murabbiyligiga nomzodlar ro‘yxatiga qo‘shildi. «Skuadra Adzurra» ustozi kursisi shu oy boshida Djennaro Gattuzo iste’foga chiqqanidan beri bo‘sh qolmoqda.

Eslatib o‘tamiz, italiyaliklar Jahon chempionatiga saralashning o‘tish o‘yini finalida Bosniya va Gersegovinaga penaltilar seriyasida imkoniyatni boy berib, mundial yo‘llanmasidan mahrum bo‘lishgan edi.

Klaudio Ranyeri o‘tgan yilning yozidan beri «Roma»da boshqaruv kengashi maslahatchisi sifatida ishlab kelayotgandi. Bungacha u «bo‘rilar»ga murabbiylik qilgan va shundan so‘ng murabbiylik faoliyatini yakunlaganini e’lon qilgan edi.