«Манчестер Юнайтед» сардори Бруну Фернандеш Криштиану Роналду ниҳоят ушбу совринни қўлга киритиши учун Португалия терма жамоасининг 2026 йилги Жаҳон чемпионатидаги ғалабасини интизорлик билан кутаётганини тан олди.
«Яқинлашиб келаётган Жаҳон чемпионатини Криштианунинг ғалабаси билан якунлаш ақл бовар қилмайдиган иш бўларди. Бунга эришишимиздан жуда умидворман. Бу нафақат Португалия учун, балки Криштиану футбол ва бутун дунё учун қилган ишлари эвазига ҳам муҳимдир», — дея футболчининг сўзларини келтиради BBC.
Роналду илк бор бундан 20 йил аввал — 2006 йили Германияда ўтган Жаҳон чемпионатида иштирок этган эди. Унинг даврида португалияликлар қайд этган энг юқори натижа тўртинчи ўрин (2006 йилда) бўлиб қолмоқда.
