Лондоннинг «Арсенал» клуби ҳужумкор ярим ҳимоячиси Мартин Эдегор «Ньюкасл»га қарши бўлажак ўйин борасидаги кутишлари билан ўртоқлашди. Англия Премьер-лигасининг 34-туридан ўрин олган баҳс бугун, 25 апрель куни «тўпчилар»нинг уй стадионида бўлиб ўтади. Учрашув бошланиши Тошкент вақти билан соат 21:30 га белгиланган.
«Биз ушбу босқичда олдимизга қўйилган вазифани жуда яхши тушуниб турибмиз ва охиригача курашамиз. «Ньюкасл»га қарши ўйин осон бўлмайди. Биз бу жамоанинг кучли эканини биламиз. Аммо мақсадимиз аниқ: курашни давом эттириш ва ғалабага эришиш», — деди норвегиялик футболчи.
Ўтган турдан сўнг Микель Артета жамоаси турнир жадвалидаги пешқадамликни қўлдан чиқарди. Лондонликлар ва «Манчестер Сити» бир хил миқдорда очко жамғарган, бироқ «шаҳарликлар» урилган голлар сони бўйича олтин медаллар учун курашда рақибидан устунлик қилмоқда.
