Лондоннинг «Арсенал» клуби ҳимоячиси Вильям Салиба Англия Премьер-лигасининг жорий мавсумидаги чемпионлик пойгаси ҳақида ўз фикрларини билдирди.
«Мен бу ерда тўрт йилдан бери ўйнаяпман ва доим иккинчи ўринни эгаллаб келганман. Агар бу мавсумда ушбу анъанани ўзгартира олсак, бу биз учун ҳам, шахсан мен учун ҳам улкан муваффақият бўлади. Буни уддалашимизга ишончим комил», — дея Салибанинг сўзларини келтиради журналист Фабрицио Романо.
АПЛнинг 33 туридан сўнг «Арсенал» 70 очко жамғарган ҳолда турнир жадвалида иккинчи ўринда бормоқда. «Тўпчилар» қўшимча кўрсаткичлар бўйича пешқадам «Манчестер Сити»дан ортда қолишмоқда.
Бугун, 25 апрель куни Микель Артета шогирдлари ўз майдонида «Ньюкасл»ни қабул қилади. Учрашув Тошкент вақти билан соат 21:30 да бошланади.
