«Реал Мадрид» ҳужумчиси Килиан Мбаппе Испания Ла Лигаси доирасида «Реал Бетис»га қарши кечган баҳсда (1:1) орттириб олган жароҳати бўйича дастлабки тиббий кўрикдан ўтди.
DAZN нашрининг хабар беришича, бугун ўтказилган текширувлар футболчининг чап оёқ сон қисмидаги ноқулайлик даражасини баҳолашга қаратилган. Дастлабки натижалар ижобий чиққан ва жиддий жароҳат аломатлари аниқланмаган. Клуб тиббиёт ходимлари вазиятни «мушакларнинг ҳаддан ташқари зўриқиши» сифатида баҳоламоқда.
Шунга қарамай, «қироллик клуби» эҳтиёт чораси сифатида душанба куни ҳужумчини яна бир бор чуқурлаштирилган МРТ текширувидан ўтказади. Шундан сўнг Мбаппенинг тикланиш муддати ва яқин орадаги ўйинларда иштирок этиш масаласига тўлиқ ойдинлик киритилади.
Эслатиб ўтамиз, Мбаппе «Бетис» билан ўйиннинг 80-дақиқасида оғриқ ҳис қилгани сабабли захирага олинган эди. Унинг ўрнига майдонга Гонсало Гарсия тушганди.
