Мадриднинг “Реал” клуби собиқ футболчиси Альваро Бенито нима учун германиялик мутахассис Юрген Клопп “қироллик клуби” бош мураббийига айланмаслиги борасидаги фикрлари билан ўртоқлашди. Бу ҳақда Marca нашрига таяниб Championat хабар берди.

Бенитонинг таъкидлашича, Клоппнинг ўзига хос ва мураккаб ўйин услуби Мадрид клубидаги талабларга мос келмаслиги мумкин.

“Мен унинг иш услубини синчиклаб ўрганганман. Бир сафар Клопп янги жамоага келган илк йилида одатда натижа кўрсатиш қийинлигини айтган эди. Унинг ўйин услуби машғулотларда шундай катта жисмоний юклама талаб қиладики, бунга чидай олмаган баъзи ўйинчилар жароҳат олади, бошқалари эса таркибдан тушиб қолади. Фақат шундан кейингина у ўзига мос келадиган футболчиларни саралаб, кейинги мавсумга жамоа туза олади”, дейди Бенито.

Собиқ футболчининг фикрича, “Реал” раҳбарияти германиялик мураббийга бундай узоқ вақт ва тажрибалар учун имконият бермайди:

“У ‘Реал’га келмайди. Сабаби Клопп жамоани фақат ўз қолиплари асосида бошқаради. Мадридда эса унга бундай эркинлик берилмайди. Агар мураббийга ўз ғояларини тўлиқ амалга оширишга қўйиб беришмаса, унинг ўзига хос услубидан нима фойда?​

Маълумот учун, Юрген Клопп 2023/24-йилги мавсум якунида чарчоқ сабабли “Ливерпуль”ни тарк этган эди. У клубда саккиз мавсум давомида бешта йирик соврин, жумладан, Чемпионлар Лигаси ва Премьер Лигада зафар қучди.