«Барселона» вингери Маркус Рэшфорд ижара муддати якунланганидан кейин ҳам клубда қолиш ниятида. «Кўк-анорранглилар» инглиз футболчисини «Манчестер Юнайтед»дан сотиб олиш ҳуқуқи билан ижарага олишган эди.

Инсайдер Фабрицио Романонинг хабар беришича, Рэшфорд Каталонияда қолишни истамоқда — у келгуси мавсумда жорий йилдагидан кўра яхшироқ натижа кўрсатишига ишончи комил. «Барселона» эса ҳозирча футболчи борасида якуний қарорга келгани йўқ.

Маркус Рэшфорд Ханс-Дитер Флик жамоаси сафида 45 та учрашувда майдонга тушиб, 13 та гол ва шунча голли узатмани ўз ҳисобига ёздириб қўйди. 28 ёшли футболчини тўлиқ сотиб олиш Ла Лига гранди учун 30 миллион еврога тушиши мумкин.