«Бавария» чап қанот ҳимоячиси Альфонсо Дэвисни сотиш вариантини кўриб чиқмаяпти ва ОАВдаги хабарларга қарамай, уни трансферга қўймаган. Бу ҳақда Sky Sports журналисти Керри Хау хабар бермоқда.
Манбанинг маълумотига кўра, Мюнхен клуби канадалик футболчининг трансфери бўйича музокараларга фақат фавқулодда таклиф олсагина очиқ бўлиши мумкин. Дэвиснинг ўзи ҳам «Бавария»ни тарк этишга интилмаяпти. Таъкидланишича, 25 ёшли ҳимоячи мавсумига қарийб 20 миллион евро маош билан жамоанинг энг кўп маош олувчи футболчиларидан бири ҳисобланади.
Аввалроқ журналист Кристиан Фальк Дэвисга «Манчестер Юнайтед» қизиқиш билдираётгани ҳақида хабар берган эди.
Жорий мавсумда Дэвис барча турнирларда 20 та ўйинда иштирок этиб, битта гол урди ва учта голли узатмани амалга оширди. Футболчининг клуб билан амалдаги шартномаси 2030 йилнинг ёзига қадар мўлжалланган. Transfermarkt портали маълумотларига кўра, унинг бозор қиймати 45 миллион еврони ташкил этади.
