«Тоттенхэм Хотспур» ярим ҳимоячиси Хави Симонс оғир жароҳат сабаб 2026 йил АҚШ, Канада ва Мексикада бўлиб ўтадиган жаҳон чемпионатини ўтказиб юборади. Бу ҳақда нидерландиялик футболчининг ўзи ижтимоий тармоқдаги саҳифасида маълум қилди.

«Айтишадики, ҳаёт шафқатсиз, ва бугун мен айнан шуни ҳис қиляпман. Мавсум мен учун кутилмаганда якунланди ва мен ҳали ҳам буни англашга ҳаракат қиляпман. Ростини айтсам, қалбим синган. Бунинг ҳеч бири маъно касб этмаяпти.

Менинг ягона истагим жамоам учун курашиш эди, энди эса бу имконият мендан тортиб олинди… жаҳон чемпионати билан бирга. Ёзда мамлакатим шарафини ҳимоя қилиш орзуси… шунчаки йўқолди.

Буни қабул қилиш учун вақт керак бўлади, аммо мен барибир жамоам учун энг яхши шерик бўлишда давом этаман. Биргаликда бу синовдан ўтишимизга ишонаман.

Энди мен бу йўлдан имон, куч, матонат ва ишонч билан ўтаман, майдонга қайтиш кунларини санайман. Менга сабрли бўлинглар. COYS», — деб ёзди Симонс.

Эслатиб ўтамиз, футболчи Англия Премьер-лигасининг 34-туридан ўрин олган «Вулверхэмптон»га қарши баҳсда (1:0) жароҳат олган эди.