Мадриднинг "Реал" клубида аллақачон янги бош мураббий излаш ишлари бошланган. Альваро Арбелоа мавсум якунланганидан кейин ўз лавозимини тарк этиш эҳтимоли жуда юқори.
MatchDay Central нашри берган маълумотларга кўра, клуб президенти Флорентино Перес айни дамда "ПСЖ"да муваффақиятли фаолият юритаётган Луис Энрикени таклиф қилиш имкониятларини ўрганмоқда. "Қаймоқранглилар" раҳбарияти 55 ёшли мутахассис жамоадаги мавжуд муаммоларни ҳал қила олади, деб ҳисобламоқда.
Луис Энрикенинг амалдаги шартномаси 2027 йилнинг ёзига қадар мўлжалланган. Эслатиб ўтамиз, у футболчилик даврида 1991 йилдан 1996 йилгача "Реал" шарафини ҳимоя қилган, шундан сўнг "Барселона"га ўтиб кетган эди. Ўтган мавсумда мураббий "ПСЖ"ни ўз тарихидаги илк ЕЧЛ ғолиблиги сари бошлаб келди.
