«Барселона»га тегишли бўлган ва ҳозирда ижара асосида «Монако» шарафини ҳимоя қилаётган ҳужумчи Ансу Фатининг отаси — Бори Фати ўғлининг режалари билан ўртоқлашди.
23 ёшли футболчи жорий мавсумни Франция чемпионатида ўтказмоқда. «Монако» клуби испаниялик футболчини тўлиқ сотиб олиш ҳуқуқига эга бўлса-да, ҳозирча якуний қарор қабул қилингани йўқ. Бори Фатининг сўзларига кўра, футболчининг ўзи ҳозирги жамоасида қолишни афзал кўрмоқда.
«Биз ҳозирча аниқ бир гап айта олмаймиз. Ансунинг «Монако»да қолишини истаган бўлардик, чунки унга бу ердаги муҳит маъқул келмоқда. Бироқ унинг «Барселона» билан 2028 йилгача мўлжалланган шартномаси бор. Воқеалар ривожини кузатамиз», — дея Бори Фатининг сўзларини келтиради машҳур инсайдер Фабрицио Романо.
Маълумот учун, Ансу Фати «Монако» сафида муваффақиятли мавсумни ўтказмоқда. У «қизил-оқлар» либосида 27 та учрашувда майдонга тушиб, рақиблар дарвозасини 10 бор ишғол этишга муваффақ бўлди.
