«Арсенал» клубининг собиқ ҳимоячиси Эммануэль Эбуэ ажрашиш жараёнидан сўнг бор мол-мулкидан айрилгани ва ҳаётининг энг оғир даврларини бошдан кечираётганини маълум қилди.

Футболчи «The 5th House» подкастида берган интервьюсида Англиядаги уйлари, машиналари ва пулларини йўқотганини очиқлади.

«Англияда кўплаб уйларим ва машиналарим бор эди. Ажрашишдан кейин ҳамма нарсани, ҳатто пулларимни ҳам йўқотдим. Вазият шу даражага етдики, баъзида ейишга овқат ҳам топа олмай қолдим», — дейди собиқ футболчи.

Шунингдек, Эбуэ оилавий муносабатларидаги узилиш, айниқса, фарзанди билан боғлиқ вазият уни қаттиқ изтиробга солаётганини таъкидлади. Унинг сўзларига кўра, ўғли «Челси» академиясига қабул қилинганини ҳам бегоналардан эшитган. Ота ва ўғил ўртасидаги алоқа узилганига беш йил бўлган.

Эслатиб ўтамиз, Эммануэль Эбуэнинг фаолиятидаги пасайиш 2016 йилда бошланган эди. Ўшанда ФИФА агентлар олдидаги 850 минг фунт стерлинг миқдоридаги қарздорлиги туфайли уни футболдан бир йилга четлатганди. Шу воқеадан сўнг у профессионал фаолиятини якунлаган эди.

Маълумот учун, Кот-д’Ивуарлик ҳимоячи фаолиятининг энг гуллаган даврини (2004–2011 йиллар) Лондоннинг «Арсенал» клубида ўтказган ва жамоа сафида 200 дан ортиқ ўйинда майдонга тушган.