«Arsenal» klubining sobiq himoyachisi Emmanuel Ebue ajrashish jarayonidan so‘ng bor mol-mulkidan ayrilgani va hayotining eng og‘ir davrlarini boshdan kechirayotganini ma’lum qildi.

Futbolchi «The 5th House» podkastida bergan intervyusida Angliyadagi uylari, mashinalari va pullarini yo‘qotganini ochiqladi.

«Angliyada ko‘plab uylarim va mashinalarim bor edi. Ajrashishdan keyin hamma narsani, hatto pullarimni ham yo‘qotdim. Vaziyat shu darajaga yetdiki, ba’zida yeyishga ovqat ham topa olmay qoldim», — deydi sobiq futbolchi.

Shuningdek, Ebue oilaviy munosabatlaridagi uzilish, ayniqsa, farzandi bilan bog‘liq vaziyat uni qattiq iztirobga solayotganini ta’kidladi. Uning so‘zlariga ko‘ra, o‘g‘li «Chelsi» akademiyasiga qabul qilinganini ham begonalardan eshitgan. Ota va o‘g‘il o‘rtasidagi aloqa uzilganiga besh yil bo‘lgan.

Eslatib o‘tamiz, Emmanuel Ebuening faoliyatidagi pasayish 2016 yilda boshlangan edi. O‘shanda FIFA agentlar oldidagi 850 ming funt sterling miqdoridagi qarzdorligi tufayli uni futboldan bir yilga chetlatgandi. Shu voqeadan so‘ng u professional faoliyatini yakunlagan edi.

Ma’lumot uchun, Kot-d’Ivuarlik himoyachi faoliyatining eng gullagan davrini (2004–2011 yillar) Londonning «Arsenal» klubida o‘tkazgan va jamoa safida 200 dan ortiq o‘yinda maydonga tushgan.