Мадриднинг «Реал» клуби раҳбарияти кутилмаган ва кескин қарор қабул қилиш арафасида турибди. Журналист Роман Молинанинг хабар беришича, жамоа бош мураббийи Альваро Арбелоа мавсум якунига етмасдан ишдан бўшатилиши мумкин.
Маълумотларга кўра, агар «қаймоқранглилар» навбатдаги «Барселона»га қарши баҳсда мағлубиятга учраса, Арбелоанинг истеъфоси муқаррар бўлади. Ваҳоланки, аввалроқ клуб президенти Флорентино Перес мураббийга камида ёзгача имконият беришни режалаштирган эди.
Таъкидлаш жоизки, «Реал» учун жорий мавсум омадсиз кечмоқда. Жамоа аллақачон Испания кубоги ва Чемпионлар лигасини тарк этиб бўлган. Ла Лигада эса мадридликлар пешқадам «Барселона»дан 11 очкога ортда қолган ҳолда иккинчи ўринда боришмоқда. Очколар орасидаги бундай катта фарқ «қироллик клуби»нинг чемпионлик унвонини ҳимоя қилиш вазифасини деярли имконсиз қилиб қўйган.
