Лондоннинг «Тоттенхэм» клуби ярим ҳимоячи Хави Симонснинг жароҳати қанчалик жиддий эканини маълум қилди.

Эслатиб ўтамиз, 23 ёшли футболчи АПЛ 34-тури доирасидаги «Вулверхэмптон»га қарши баҳсда (1:0) жароҳат олиб, майдонни замбилда тарк этган эди. Тиббий кўриклар натижасида футболчининг тиззасидаги олдинги хочсимон бойламлари узилгани аниқланди.

Лондон клуби берган хабарга кўра, Симонс яқин ҳафталар ичида жарроҳлик амалиётини ўтказади. Футболчининг ўзи ҳам ижтимоий тармоқлар орқали ушбу жароҳат туфайли 2026 йилги жаҳон чемпионатини ўтказиб юборишини тасдиқлади.

Маълумот учун, Хави Симонс АПЛнинг жорий мавсумида 28 та ўйинда майдонга тушиб, 2 та гол ва 5 та голли узатмани амалга оширган эди.