Мадриднинг «Реал» клуби 22 ёшли ҳужумчиси Гонсало Гарсияни ёзги трансфер ойнасида сотишга тайёр. As нашрининг хабарига кўра, «қироллик клуби» футболчига қизиқиш билдирган Италия клубларидан бирига 60 миллион евролик талаб қўйган.

Шу билан бирга, Германия ОАВлари Дортмунднинг «Боруссия» клуби ҳам футболчи учун курашга қўшилганини ёзмоқда. Бироқ «арилар» таклиф қилаётган 30 миллион евро Мадрид клубининг талабларига мос келмаяпти ва ҳозирда музокаралар тўхтаб қолган.

Агар бирор клуб «Реал» сўраган суммани тўлашга рози бўлса, Гарсия клуб академиясидан чиққан энг қимматбаҳо иккинчи футболчига айланади. Бу борадаги рекорд ҳамон Альваро Моратага тегишли бўлиб, у 2017 йилда 80 миллион евро эвазига «Челси»га трансфер қилинган эди.

Маълумот учун, Гонсало Гарсия жорий мавсумда Ла Лига доирасида 25 та учрашувда майдонга тушди. У ҳар бир ўйинда ўртача 27 дақиқа ҳаракат қилиб, ўз ҳисобига 4 та гол ёздириб қўйишга муваффақ бўлди.