Мадриднинг «Реал» клуби асосий дарвозабони Тибо Куртуа жароҳатидан тикланиш жараёнини якунламоқда. Март ойи ўрталаридан буён майдонга тушмаган бельгиялик посбон яқин кунларда машғулотларга қайтади.

COPE нашрининг хабар беришича, Куртуа 10 май куни сафарда «Барселона»га қарши кечадиган «эл-класико» баҳсига қадар тўлиқ соғайиб, сафга қайтиши кутилмоқда. Ушбу учрашув чемпионлик тақдирини ҳал қилиши мумкин, гарчи каталонияликлар назарий жиҳатдан келаси турдаёқ етиб бўлмас масофага чиқиб олишлари мумкин бўлса-да.

Куртуанинг йўқлигида «қироллик клуби» дарвозасини Андрей Лунин қўриқламоқда. Украиналик дарвозабон ишончли ҳаракатлари билан ажралиб турибди ва ҳатто «Бетис» билан баҳсда (1:1) ўйиннинг энг яхши футболчиси деб топилган эди.