Madridning «Real» klubi asosiy darvozaboni Tibo Kurtua jarohatidan tiklanish jarayonini yakunlamoqda. Mart oyi o‘rtalaridan buyon maydonga tushmagan belgiyalik posbon yaqin kunlarda mashg‘ulotlarga qaytadi.
COPE nashrining xabar berishicha, Kurtua 10 may kuni safarda «Barselona»ga qarshi kechadigan «el-klasiko» bahsiga qadar to‘liq sog‘ayib, safga qaytishi kutilmoqda. Ushbu uchrashuv chempionlik taqdirini hal qilishi mumkin, garchi kataloniyaliklar nazariy jihatdan kelasi turdayoq yetib bo‘lmas masofaga chiqib olishlari mumkin bo‘lsa-da.
Kurtuaning yo‘qligida «qirollik klubi» darvozasini Andrey Lunin qo‘riqlamoqda. Ukrainalik darvozabon ishonchli harakatlari bilan ajralib turibdi va hatto «Betis» bilan bahsda (1:1) o‘yinning eng yaxshi futbolchisi deb topilgan edi.













