«Манчестер Юнайтед» жамоаси Майкл Кэррик бошқаруви остида очко йиғиш суръатини кескин оширишга муваффақ бўлди. 44 ёшли мутахассис жорий йилнинг 13 январь куни Рубен Аморим истеъфосидан сўнг (Даррен Флетчернинг қисқа муддатли муваққат бошқарувидан кейин) жамоа тизгинини ўз қўлига олган эди.

АПЛнинг 34-турида «Брентфорд» устидан қозонилган ғалабадан (2:1) сўнг, манкунианликлар ҳисобидаги очколар сони 61 тага етди. Таққослаш учун, Рубен Аморим қўл остида жамоа мавсумнинг дастлабки 20 та ўйинида 31 очко тўплаган эди. Кэррик келганидан кейинги ва Флетчер бошқарган бир ўйинни ўз ичига олган жами 14 та баҳсда эса клуб 30 очко ишлаб олди.

Бу шуни англатадики, жамоа мавсумнинг иккинчи ярмида анча барқарор ўйин кўрсатмоқда. Айни дамда «Юнайтед» Премьер-лига турнир жадвалида учинчи ўринни эгаллаб турибди.