Италиянинг «Комо» клуби раҳбарияти жамоа бош мураббийи Сеск Фабрегас кейинги мавсумда ҳам ўз лавозимида ишлашда давом этишига тўла ишонмоқда. Бу ҳақда журналист Фабрицио Романо ўзининг X ижтимоий тармоғидаги саҳифасида хабар берди.

Манбанинг таъкидлашича, мутахассиснинг ўзи ҳам ҳозирги ҳолатидан мамнун ва клубда қолишни истайди.

Сеск Фабрегас 2024 йилнинг ёзидан бери «Комо»ни бошқариб келмоқда. Италия чемпионатининг 34 туридан сўнг жамоа 61 очко жамғариб, турнир жадвалида бешинчи ўринни эгаллаб турибди. Жамоа ҳисобида 17 та ғалаба, 10 та дуранг ва 7 та мағлубият мавжуд.

Италия Кубогида эса «Комо» ярим финалгача етиб борди ва у ерда «Интер»га имкониятни бой берди (0:0, 2:3). Испаниялик мутахассиснинг амалдаги шартномаси 2028 йилнинг ёзига қадар мўлжалланган.