«Бавария» ҳужумчиси Харри Кейн Чемпионлар Лигаси ярим финали доирасида «ПСЖ»га қарши кечган илк ўйинда гол уриб, инглиз футболчилари ўртасида янги рекорд ўрнатди. Сешанба куни Парижда бўлиб ўтган учрашув мюнхенликларнинг 4:5 ҳисобидаги мағлубияти билан якунланди.

Кейн ўз ҳисобига битта гол ёздириб қўйди — у 17-дақиқада пенальтини аниқ амалга оширди. Шу тариқа, ҳужумчи кетма-кет олтита Чемпионлар Лигаси баҳсида гол уришга муваффақ бўлди. Squawka нашрининг хабар беришича, бу турнир тарихидаги барча инглиз футболчилари ичида рекорд серия ҳисобланади.

32 ёшли футболчи «Ливерпуль»нинг афсонавий собиқ ярим ҳимоячиси Стивен Жеррард томонидан 2008 йилда ўрнатилган натижани янгилади. Харри Кейн энг нуфузли еврокубокнинг жорий мавсумидаги тўпурарлар рўйхатида 13 та гол билан иккинчи ўринни эгаллаб турибди ва фақат Килиан Мбаппедан (15 та гол) ортда қолмоқда.